काव्य पुष्प-२२० आपण काय करतोय ?
आपण काय करतोय ?
आपल्या आज्या पंज्यानी वाढवलेल्या झाडांची फळे आपण चाखतोय
पुढच्या पिढीला आपण काय देतोय
झाडं लावून संवर्धन करतोय ||
आज्या पंज्यानी कमावलेल्या
शेतीभातीचा हकदार होतोय
वाडवडिलांनी फुलविलेला मळा
आपण राखण्याचं काम करतोय ||
दिवसरात अन्नदाते कष्ट करतायत
काहीजण शिवारमळे फुलवतायत
नवतंत्राचा अवलंब करतायत
शेतीची उत्पादकता वाढवतायत ||
वाडवडीलांनी बांधलेल्या वाड्याची
आपण मात्र वाटणी करतोय
वेगळी चूल मांडून सुख मिळण्याचा
आपण मात्र फुकाचा भाव खातोय ||
भुतकाळाची पानं चाळताना
दिमाखदार मानमरातब आठवतोय
पूर्वजांच्या कर्तृत्व पुण्याईवर
आपण मात्र मस्तपैकी जगतोय||
खेडी गावं ओस पडू लागली
आपण शहराकडे धावतोय
लग्न मयती यात्रेखेत्रेला
गावाला धावपळीत जातोय ||
साठवणीतल्या आठवणी
उगाळत विवंचनेत बसतोय
मातीचा ऋणानुबंध जपायला
कधीतरी शेताकडे जातोय ||
श्री रवींद्र लटिंगे ओझर्डे वाई
Comments
Post a Comment