काव्य पुष्प - २३५ मेघांची वारी पंढरीची वारी

        गजर हरीचा गजर भक्तीचा 

मेघांची वारी,आषाढ सरी |

पंढरीची वारी, माझी वारी  |

नभ उतरले माथ्यावरी

पांघरली दुलई ढगांनी

धूसरली हिरवी छाया 

खेळ होई पाठशिवणी||

सरीवर सर चळक वाढी

झालं ओलं शिवार

फण रेघोट्या ओढी

कुळव नांगरी वावार ||

मेघांची आली वारी 

झालं रिंगण भुईवरी 

वात लहरी फेर धरी

थेंब होई विणेकरी||

दिंडी आली मेघांची

नाचती आषाढ सरी 

साधना भाव-भक्तीची

गजर करती जयहरी ||

आली दिंडी मेघांची

बरसली थेंब थेंब धारं

पीकं बहरली चैतन्याची

पंढरी माझं शेतशिवारं||

भावभावनांचा वारु नाचे  

मनगाभाऱ्याच्या रिंगणी

आषाढ सरींनी उसळल्या 

सुखलहरी हर्षाच्या अंगणी ||

भक्तीची वारी घडते पंढरपुरी

जय जय विठ्ठल जय हरी

पावले थबकली आता घरी

घरीच साजरी पंढरीची वारी||

श्री रवींद्रकुमार लटिंगे ओझर्डे वाई

दिनांक  १८ जुलै २०२१