काव्य पुष्प-२३२ विटी-दांडू
विटी-दांडू
खेळ हा मजेशीर मातीतला
रिंगण गलीत या खेळायला
ओलीसुकीने डाव सुरू झाला
रिंगणातून दांडूने विट्टी कोला|
विट्टी झेलण्या टपले खेळाडू
चिअर अप देती सगळेच भिडू
खेळ उधळायला लागले नडू
वादाचे कोलाहल लागले झडू |
घेता घेता विट्टीचा झेल सुटला
एकबल होता डबल झाला
मग विट्टीला टोला लगावला
विट्टीच्या मापाचा स्कोर झाला|
दुसऱ्या भिडूने विट्टी कोलली
धावत पळत जावून ती झेलली
त्याची मग गलक्याने हुर्यो केली
गटाची एक खेळी संपत आली|
प्रतिस्पर्ध्यांचा डाव सुरू झाला
विट्टी कोलता दांडू निसटला
मग दुसऱ्याने टोला हाणला
झेल टिपताना पाय घसरला |
विट्टीला दांडूने थोडं उसळवले
डबल करता करता टिबल झाले
मग विट्टीला हवेत टोलवले
चपळाईने झेलबाद केले|
असाच खेळ राहिला रंगत
चिडाचिडीत होती झगडे
मध्यंतरी बसते खाऊची पंगत
भांडणं विसरण्याचे देती धडे |
श्री रवींद्रकुमार लटिंगे ओझर्डे वाई
९ जुलै २०२१
Comments
Post a Comment