माझी आई
मातृहृदयाचे मंगल स्त्रोत्र
माझी आई
आई म्हणजे आमची पंढरी
सुखीसंसार हीच तिची वारी
तिने घेतली या जगातून भैरवी
नेत्रात पालवती अश्रुंच्या सरी||१||
आई घरकुलाची गोधडी
आई आयुष्याची नावाडी
आई जादुगाराची पोतडी
आई तराजूची पारडी||२||
तिच्या हातची खावी वडी
कानावले अन् खिचडी
रुखवताची भरुन दुरडी
घेई उखाण्याची रेलगाडी ||३||
चवदार भोजनाची सुगरण
जसे दुधाच्या सायीचे आवरण
आर्त वेदनांचे केले आचमन
स्मृतीपटावर पाझरते आठवण||४||
गोतावळ्यातील मायमाऊली
आभाळमाया आम्हा लाभली
तुझ्या आधारवडाची सावली
आम्हा समद्यांना सदैव मिळाली||५||
आमच्या झोळीत पडलं
इतरांना सहकार्याचे दान
आम्हाला संस्कारक्षम केलं
याचा आहे आम्हा अभिमान||६||
कष्टाचा घाम शेतात गाळून
दुसऱ्यांचे बांध धुंडाळले
आहे त्यात समाधान मानून
जीवन आमचे उभारले ||७||
भावाबहिणींच्या प्रेममायेची आक्का
ऋणानुबंध जपण्याचा इरादा पक्का
सणवार लग्नकार्याला समद्या कामाची
आळीतल्या सगळ्यांची'मामी'हक्काची ||८||
यमुनासुत रवींद्र लटिंगे
—----------------------------------------
आई माझं दैवत!
काबाडकष्ट करून
आम्हाला वाढवलं
शेतात घाम गाळून
आम्हाला घडवलं ||१||
आमचे बालहट्ट
स्वता:चे मन मारुन पुरवले
स्वत: मेहनत करून
आम्हाला संस्कारीत केले ||२||
कष्टानं जगण्याची
शिकवण दिली
खऱ्यानं वागण्याची
सवय लावली ||३||
समाधानी वृत्तीनं
जगण्याची उमेद दिली
निस्वार्थी सेवेची
उर्मी निर्माण केली ||४||
मायेचा आधार
कष्टाची भाकर
जीवनाचे सार
मांगल्याचे घर ||५||
आमची सावली
कृपाळू माऊली
आजारात धावली
कनवाळू माऊली||६||
मायेची ऊब कुशीतली
आम्हाला सतत लाभली
तुझ्या आधाराची सावली
आम्हाला सदैव मिळाली||७||
आमच्या झोळीत पडलं
इतरांना सहकार्याचे दान
आम्हाला सुसंस्कारित केलं
याचा आहे अभिमान||८||
मायमाऊलीची स्नेहाळदृष्टी
हीच तिची आभाळमाया
सदोदित आधाराची सृष्टी
मनोभावे पडावे तिच्या पाया....!!
श्री रवींद्रकुमार गणपत लटिंगे वाई सातारा
Comments
Post a Comment