काव्यपुष्प क्रमांक:२६५ पाऊसपाणी

पाऊसपाणी

दाट धुकं अन् रिमझिम पाऊस 

थंड गारवा देतोय तनमनाला 

अंगावर घेत भिजण्याची हौस

आठवण करते क्षणाक्षणाला.. ||

ओथंबून भरलेलं काळं आभाळ 

क्षणाभरात रितं होवू लागले.....

रानातल्या भुईवर थेंबाची धार

नक्षीदार रांगोळी उमटवू लागले.....||

हिरव्या रानी चिंब गार वारा 

पानापानातून बासरी वाजवितो ....

क्षणात डोंगरावर धुकं पसरुनी

निसर्गाविष्कार मनाला भुरळवतो....||

हिरव्यागार रानी पावसाचं पाणी  

तृणपाती लतावेली गाती गाणी

धबधब्यातून उसळी दुधाळ पाणी 

अंगाव शहारे आनी वाऱ्याची वाणी||

बैलं पाट्याळानी करतायत चिखलणी 

खाचरात चिखल झाला मऊ लोण्यावाणी

ओठावरी येतात मग माहेराची गाणी 

मुसळधार पावसात धानाची लावणी||